"தமிழக மக்களுக்கு துரோகம் இழைக்கும் அதிமுக அரசு செலவில் விளம்பரம் செய்வதை நிறுத்தி, கட்சி நிதியில் செய்வதோடு - 'வெற்றுநடை போடும் தமிழகம்' என விளம்பரத்தை மாற்ற வேண்டும்"
- திமுக முதன்மைச் செயலாளர் திரு. கே.என்.நேரு MLA அவர்கள் அறிக்கை.
டெண்டரே விடாமல் திட்டங்களுக்கு அடிக்கல் நாட்டி நான்கு ஆண்டுகள் மக்களை ஏமாற்றியது போதாது என்று ஆட்சியை விட்டுப் போகப் போகின்ற நேரத்திலும் கூட ஏமாற்றிக் கொண்டிருக்கிறார் முதலமைச்சர் திரு. பழனிசாமி என்பது மிகுந்த வேதனையளிக்கிறது.
ஊழல் என்ற கரன்சி முகட்டில் உட்கார்ந்து கொண்டு போக்குவரத்துத்துறை அமைச்சர் திரு. எம்.ஆர்.விஜயபாஸ்கர், ஏதோ தன் துறையில் ஊழலே நடக்கவில்லை என்று அப்பாவி போல் நேற்று முன்தினம் போட்ட வேடத்தை நேற்றுக் கலைத்து விட்டது சென்னை உயர்நீதிமன்றம் அளித்துள்ள இடைக்காலத் தடையுத்தரவு. “118 நிறுவனங்கள் இருக்கும் போது 8 நிறுவனங்களிடம் ஜி.பி.எஸ். கருவி வாங்க போக்குவரத்துத்துறை அளித்த உத்தரவுக்கு” தடை வழங்கியுள்ள உயர்நீதிமன்றம் போக்குவரத்துச் செயலாளர் ஜனவரி 18-ஆம் தேதிக்குள் பதில் மனுத் தாக்கல் செய்ய வேண்டும் என்று உத்தரவிட்டிருக்கிறது. ஏற்கனவே இந்த நிறுவனங்களுக்குப் போட்ட உத்தரவைப் போக்குவரத்து ஆணையர் நிறுத்தி வைத்துள்ளதாக இன்று டைம்ஸ் ஆப் இந்தியா பத்திரிகையில் செய்தி வெளி வந்துள்ளது.
